Djamars 15 di aprel 2025, e fecha ku Union di Habitantenan di Pariba a stipulá pa Gobièrnu a vense. Union di habitantenan di Pariba a manda un karta, fechá 1 di aprel 2025, pa Gobièrnu/GMN. Den e karta habitantenan ta duna di konosé ku nan ke pa yega na un solushon real pa ku dùmpmentu di mèst di Modèrno farm riba terenonan na Dam Pretu òf pa tuma medidanan di kòntròl (handhaving) relashoná ku molèster di holó i plaga di muskita ku e habitantenan di e barionan, ya menshoná, ta sufri di dje. Si no konsiderá e petishon aki despues di 15 di aprel habitantenan lo kuminsá un kaso den korte kontra gobièrnu i Modèrno. Esaki relashoná ku derechi di kada habitante riba un medio ambiente saludabel i derechi di por biba trankil den nos mes kas. E derechinan aki ta ankrá den leinan i tratadonan lokal i internashonal.
E ultimatem di habitantenan a vense ayera 15 di aprel, awe nos por tuma nota ku ya for di 5 di aprel segun deklarashon di Modèrno, nan no ta basha e mèst mas na Dam Pretu.
E molèster di holó i plaga di muskita a bai konsiderabelmente den e área rondó di Dam Pretu. Un bes mas nos por bisa ku union, konsistensia i perseveransha a hiba na éksito pa salbaguardiá salú públiko i trankilidat di komunidat.
Biaha pasá tabata e lucha kontra tiramenrtu di sushi i kobamentu ilegal di greis awe ta e lucha kontra mèst di galiña
Loke Unidat di Habitantenan di Pariba a komprondé ku e dokumentonan pa duna pèrmit di konstrukshon na Modèrno pa por konstruí e lots, te ainda ta serka e titular di VVRP pa firma.
Banda di esaki nos a komprondé tambe ku e mèst ta na e fábrika i ku ta tratando e ku un supstansia pa minimalisá molèsternan ku e por trese.
Un bes mas Unidat di Habitantenan di Pariba ta urgi na esnan konserní pa yega na un solushon pa ku e periodo di konstrukshon di e lots i instalashon di e makinaria ku no ta okashoná molèster pa niun habitante riba nos isla.
Por último Unidat di Habitantenan di Pariba ta gradisí komunidat, sra. Joyce Weert, sr. Jan Boef, tur habitante, firmantenan, ekspertonan, gruponan organisá, prensa, sentro di bario St. Rosa, sr. Elvin Gerard i tur ku di un òf otro forma a sostené e lucha aki pa sali na vanguardia di derechinan di habitantenan di Pariba pa por tin un mihó kalidat di bida. Komo patriota i bon YDK nos tin e deber di sali dilanti pa Kòrsou i pa futuro di Kòrsou i e YDK. Alabes nos ta keda boga pa yega na un plan nashonal pa ku solushonnan struktural relashoná ku maneho di sushi i limpiesa di nos isla.
Unidat di Habitantenan di Pariba a skohe un bes mas, pa ta parti di e solushon pa Dam Pretu i no parti di e problema. Nos a uni, mobilisá, informá, alertá, konsientisá i inbolukrá komunidat pa ku solushon rondó di e situashon na Dam Pretu. Nos ta keda vigilá e situashon skèrpi, si dado kaso bolbe faya ku derechi di siudadanonan, nos ta reanudá e proseso pa buska nos derechi den korte.
Te ainda nos ta keda mantené nos mes na e palabrashon ku Ministerio di GMN a hasi na sèptèmber 2024 na Unidat di Habitantenan di Pariba pa keda na mesa ku GMN I asina yuda vigilá e trabou di Gobièrnu, mantené gobièrnu skèrpi i tambe sigui informá i konsientisá komunidat riba nan deber síviko pa yuda tene i mantené nos isla limpi. Kada siudadano di pais tin ku karga ku nan responsabilidat i deber pa un bida sostenibel. Nos di pariba a karga di nos i lo sigui karga di nos.
No por solushoná problema di niun habitante sin su propio partisipashon den e solushon.
E úniko lucha ku bo por pèrdè ta esun ku bo bandoná.