Diasabra mainta dia 25 di januari, a tuma luga e Acto Protocolar di Dia di Betico dilanti Plaza
Libertador G.F. Betico Croes. E mainta a inicia cu presentacion di Caha di Orgel di Nelson
Thiel, Rodney Werleman y Antonio Geerman cu a entretene e invitadonan local y internacional
cu tabata yegando cu nan musica. Comision Celebracion Dianan Nacional a ricibi e invitado- y
mandatarionan. Maestra di ceremonia Jenniree Dirks a anuncia yegada Su Excelencia
Gobernador di Aruba sr. Juan Alfonso Boekhoudt hunto cu su distinguida esposa.
cu a wordo ricibi pa Minister di Finansa y Cultura, sra. Xiomara Maduro, anfitriona di e evento
hunto cu e miembronan di Comision Celebracion Dianan Nacional.
Despues cu Su Excelencia Gobernador a duna permiso e ceremonia oficial a inicia cu canto di
Himno di Aruba ‘Aruba Dushi Tera’ interpreta pa e hoben Jayzienne Theodora, acompaña pa e
maestro Jurdanny Koolman y agrupacion musical.Pastoor Toti Fuentebella di Parokia di Santa
Filomena na Paradera a haci un bunita oracion pa nos Pais Aruba henter y su gobernantenan.
Despues a sigui discurso di Prome Minister di Aruba sra. Evelyna Wever-Croes cu e presenta un
elocuente discurso comparando e lucha di Betico pa nos Status Aparte cu e construccion di e cas
cu yama Pais Aruba. Lamentablemente algun ora prome cu nos por a drenta e cas, ela haya un
accidente y despues di 11 luna den coma, a fayece. Y ta p’esey nos mester cuida e cas aki, y
stima e cas aki, cu yama Pais Aruba, pasobra nos sa cu e lucha cu Betico Croes a hiba pa Aruba
su Status Aparte no a bay facil y no a bay sin sacrificio. Y e logro di e lucha y sacrificio tabata
Aruba su Status Aparte.
E programa a continua cu e Acto di Ofrenda Floral, durante cual Parlamento di Aruba, Su
Honorabel president sra. Gerlien Croes y Grifiier di Parlamento, sr Herman Hek, Gobierno di
Aruba representa pa Su Excelencia Prome Minister sra. Evelyna Wever-Croes y Su Excelencia
Sra. Xiomara Maduro, pa Famia Croes e nietonan di Betico Croes y pa Cuerpo Consular e
consulnan a rindi homenahe na Gilberto François Betico Croes.
Despues a sigui cu un canto di “Libertador” presenta pa e hoben Xian-gelina Leon, un poesia
‘Na Betico’ skirbi pa Nena Ponson dfm cu a wordo declama pa e hoben Guizza Maria
Steenvoorde, un cancion’Himno, Bandera y Libertad’ interpreta pa Jaymerson Kelly,
presentacion di Grupo di baile Dazzling dancers y un canto “Libertad’ canta pa e hoben Jizienne
Martes. Tur e cantantenan a wordo acompaña pa e maestro Jurdanny Koolman y agrupacion
musical.
E mainta a termina cu Himno di Aruba interpreta pa e hoben Jayzianne Theodora y na final un y
tur por a sigui disfruta di e musica di Caha di Orgel di Rodney Werleman y Antonio Geerman.
Minister Xiomara Maduro ta gradici tur e invitadonan local y for di Boneiro pa nan presencia.
Alabes e mandatario ta gradici e artistanan pa nan tremendo presentacion. Un danki tambe na tur
cu a yuda pa haci e Acto Protocolar aki posibel y un Pabien y Danki na Comision Celebracion
Dianan Nacional cu un bes mas a prepara un bunita ceremonia.
